خەلق ماقال-تەمسىللىرىدىن بىر قۇچاق !

مەنبە توغراق بىز سالونى 46 0
تارقۇت ئېلانى

ئاتالماس ئوقىدىن كۆرىدۇ ، چىچالماس پوقىدىن كۆرىدۇ .
مەنىسى : ئۆزىنىڭ قابىلىيەتسىزلىكى ئۈچۈن باشقىلاردىن ئاغرىنىشنى ئىپادىلەيدۇ .
ئاتىسى بولۇشقاقنىڭ ئوغلى ئۇرۇشقاق ، ئانىسى بولۇشقاقنىڭ قىزى يىغلاڭغۇ .
مەنىسى : ئاتا-ئانا پەرزەنتلەرنى بەك ئەتىۋارلاپ خاتا قىلمىشلىرىغا يول قويۇۋەرسە پەرزەنتلەردە يامان ئىللەتلەرنىڭ باش كۆتۈرۈپ قالىدىغانلىقىنى ئىپادىلەيدۇ .
ئاختامىلىقنى چالمىسى يامان ، خوتۇن كىشىنىڭ لالمىسى يامان .
مەنىسى : ئاياللاردىكى ھورۇنلۇقنىڭ يامان ئىللەت ئىكەنلىكىنى ئىپادىلەيدۇ .
ئاتىسى ئاتالمىغان قوڭغۇزنى ، بالىسى ئېتىپتۇ توڭگۇزنى .
مەنىسى : كىيىنكىلەرنىڭ بۇرۇنقىلاردىن ئېشىپ چۈشىدىغانلىقىنى ئىپادىلەيدۇ .
ئاتنىڭ تورۇقى ياخشى ، جۇۋاننىڭ ئورۇقى ياخشى .
مەنىسى : جۆرە تاللاشتىكى شەھۋانىلىق ۋە بىر تەرەپلىمە قاراشنىڭ ياخشى ئەمەسلىكىنى كۆرسىتىدۇ .
ئارقامدىن دېگەنلەر ، تېزىكىمنى يېگەنلەر .
مەنىسى : كەينىدىن غەيۋىتىنى قىلغانلارغا پىسەنت قىلماسلىق لازىملىقىنى كۆرسىتىدۇ .
ئاز يېگەن توق يەيدۇ ، كۆپ يېگەن پوق يەيدۇ .
مەنىسى : ئۆز نىسىۋىسىگە قانائەت قىلىشنىڭ پايدىلىق ئىكەنلىكىنى ، ئىسراپخورلۇق، تاماخورلۇقنىڭ ئاقىۋىتى يامان ئىكەنلىكىنى كۆرسىتىدۇ .
ئەسكى جاڭگالنىڭ تۈلكىسى كۆپ ، تەخسىكەشنىڭ كۈلكىسى كۆپ .
مەنىسى : پەسكەش ، خۇشامەتچىلەرگە قارىتىلغان .
ئەر قېرىسا قىز ئالار ، قىز قېرىسا كىم ئالار .
مەنىسى : قىز بالىنىڭ ۋاقتىدا ياتلىق بولۇشى لازىملىقىنى كۆرسىتىدۇ .
ئەستەر چاپانغا مەشۇت ياقا ، مايماق ئىشەككە ئالتۇن تاقا .
مەنىسى : ئۆز ھالىغا باقماي ھەشەمەتخورلۇق ۋە سۆلەتۋازلىق قىلىشنى كۆرسىتىدۇ .
ئەخمەققە قىز كۆرسەتمە ، موزايغا سۈت كۆرسەتمە .
مەنىسى : ھاماقەت ئادەمگە بىرەر ئىشنىڭ ئېپىنى كۆرسەتسەك بالاغا قالىسەن .
بىزنىڭكىگە كەلسەڭ يەپلا ، سېنىڭكىگە بارسام گەپلا .
مەنىسى : خەقنىڭكىگە بېرىشقا ، يەپ-ئىچىشقا ئامراق ، ئەمما مېھمان قىلىشقا قېرىق ، بېخىل ئادەملەرگە قارىتىلغان .
پاقا سوزۇلۇپ يىلان بولالماس ، موماي ياسىنىپ جۇۋان بولالماس .
مەنىسى : قارىغۇلارچە دورامچىلىق قىلىشنىڭ نەتىجىسىز بولىدىغانلىقىنى كۆرسىتىدۇ .
تاز چىۋىننى قوندۇرماس ، چىۋىن تازنى تىندۇرماس .
مەنىسى : ئوخشاش نۇقسانلىرى ياكى يامان نىيىتى بار ئادەملەرنىڭ بىر-بىرىنىڭ پىيىغا چۈشۈپ يۈرىدىغانلىقىنى كۆرسىتىدۇ .
مېھماننى ئۆيگە سولاپ ، ئۆزى يۈرەر ئەر سوراپ .
مەنىسى : مېھماننى ئۆيگە تەكلىپ قىلىپ قويۇپ ، خىيالىغا كەلمەي يۈرۈيدىغان بىپەرۋا ئادەمگە قارىتىلغان .
ئۆزى قوڭغۇزدەك ، گېپى توڭگۇزدەك .
مەنىسى : ھالىغا بېقىپ گەپ قىلمايدىغان ھاكاۋۇر ئادەملەرگە قارىتىلغان .
بارىدا پولدۇرۇڭ ، پولدۇرۇڭ . يوقىدا قاراڭ ئولتۇرۇڭ .
مەنىسى : ھەر نەرسىنىڭ ئۆزىگە تەئەللۇق ۋاقتىدا قەدرىگە يېتىش كېرەكلىكى ئىپادىلەنگەن .
ئاخشىمى خوتۇننىڭ سۆزى راست ، كۈندۈزى ئانىنىڭ سۆزى راست .
مەنىسى : ئىككى يۈزلىمىچى ، شەخسىيەتچى كىشىلەرگە قارىتىلغان .

تارقۇت ئېلانى
باھا يوللاش جاۋاپ